الخميس، 6 نوفمبر 2008

حالة ... وحب ... وحيرة ...




لما القمر يقف ببابك ...
وأما النجوم تسرق ضي من القمر ...
وتطل بيه من شباكك ...
يرجع شبابك ...
لما نور الشمع يسطع ف الوجود ...
صوت حليم قاعد بينده ... يقول موعود ...
لما الحب ف ليلة يصبح أقوى أسرار الخلود ...
فيروز تقول وتحكي أيام الصبا ...
وبصوت نانسي تعترف : أنا معجبة ...
الورد يهمس لقلبها يقول اسمعي .... اخاف ان تمطر الدنيا ولست معي ...
بريق العيون ... ويا عطر شجر اللمون ... والفراش عمال يطير ...
الكون صامت ... وميملاهوش غير صوت منير ...
معلي صوته بالغنا ... الدنيا ريشة ف هوا ... فيها الأماني ممكنة ....
هنا وهنا ... معايا أنا ..

دي ليها عيون غزال بري ... سلاح يحميها من شري ...
وغمازات وسط الخدود ...
وابتسامة توزن بلد ...
تفتح دول..
ترفع حدود ...
بسمة حلوة تقلب البرد لدفا ...
وضحكة دايمة .. تخلي همك ...
وف ثواني اختفى ..
وخفة دم قتالة ... وميالة ..
تخلي حالتي حالة ..
وحب دايما مليان جنان ... وضحكة صافية ....
والأغاني والندا ...
تسمع معاها في الصدى ...
ضحك الطيور ... وبسم الزهور ... والسعادة المطلقة ...
وعقل وثقة ...
ان احنا جينا للحياة علشان نعيشها ...
نغازل رموشها ...
نضحك عليها ونضحك لها ...
ونتريق يوم تتكتم ... ونترسم ..
على وشها بأحلى بسمة ..
وندوب معاها ف كل نسمة ...

وحياتنا يملاها الرضا ...
لكن دنيتنا مش كده ...

الدنيا ماشية ف بحور قلق .. حكايات كتير ف قصاقيص ورق ...
وهي خايفة لتكون فراشة ... جناحها ف النار يتحرق ...




ـــــــــــــــــــــــــــــ

ابراهيم ايهاب