عيدك سعيد والله يرحمك يا عمنا ..

زي ما عمنا صلاح جاهين قال :

(( مليون عيد بيبتدوا ويفرغوا ...
ويفضل العالم كده .. دمه تقيل ...
يا ربنا ... ياللي خلقتلنا الأيادي للهزار وللعمل ...
اديني قوة ألف مليون إيد .... عشان أزغزغه ...)) وعجبي ...

وفعلا رغم ان الدنيا عيد لكن الحياة حاسس انها مبقتش زي زمان ...
ملقيتش بهجة العيد ... مشوفتش العيال الفقرية اللي قالبين الشارع ... مشوفتش الدنيا المنورة والناس المبسوطه ...
وللا ده عندنا في المقطم بس ؟!

مش عارف ... انا نفسي احساسي ان طعم العيد متغير ... حاسس ان حتى الفرحة في عيدنا ده ... حزينة ...
حاسس ان العالم يعاني من حالة اكتئاب حاد ...
ونفسي في قوة ألف مليون إيد ... عشان أزغزغه ! ...

عموما مش عايز أنكد على حد .. كل سنة وانتو طيبين وبألف مليون صحة وسلامة ...

عيد سعيد وكله فرحة وهنا .... لكنه مش عيد مبارك عشان خاطر ( إبراهيم ) عشان عنده حق فعلا ...http://anaweana.blogspot.com/


كل سنة وكلكو بأحسن حال ومبسوطين ومهيصين والدنيا معاكو ميت فل وعشرة ...

ويارب كل ايامنا تبقى اعياد ...